ՇԱՌԼ ԱԴԱՄՅԱՆ
(1872 – 1947)
Բնանկարիչ, ծովանկարիչ Շառլ (Կարապետ) Ադամյանը ծնվել է Կ. Պոլսում: Կրթությունը ստացել է Վենետիկի Մուրադ Ռափայելյան վարժարանում: Մասնավոր դասեր է ստացել Ա. Պաոլետտիի և Տ. Տակլիպիետրայի մոտ: Ադամյանը Գեղարվեստի ակադեմիայում ուսումը կիսատ թողնելով վերադարձել է Պոլիս, որտեղ և կազմակերպել է իր առաջին ցուցահանդեսը:
1897 թվականին մեկնելով Փարիզ, զբաղվել է գրքերի նկարազարդումով: 1903 թվականից ի վեր մասնակցել է Փարիզի գեղարվեստական ընկերության տարեկան ցուցահանդեսներին՝ բնանկարներով, դիմանկարներով և 1927 թվականից եղել է այդ ընկերության անդամ:
Նրա նկարները ցուցադրվել են Եվրոպայից մինչև Ամերիկա, Ճապոնիա և այլուր՝ արժանանալով մամուլի բարձր գնահատականին: Գրաֆիկական ակտիվ ստեղծագործությանը զուգընթաց Ադամյանը նվիրվել է նաև պորտրետային նկարչությանը՝ ստեղծելով շատ հաջող դիմանկարներ, որոնց թվում էին հայ ընկերներից լուսանկարիչ Աբել Մինասյանի, նկարիչներ՝ Տիգրան Եսայանի և Ռ. Շիշմանյանի դիմանկարները:
- Անհատական ցուցահանդեսներ է ունեցել Կ Պոլսում, Փարիզում, Բրյուսելում, Ստրասբուրգում:
Կարապետ Ադամյանի աշխատանքներից մի քանիսը գտնվում են Փարիզի լյուքսեմբուրգյան և այլ թանգարաններում, Հայաստանի Ազգային պատկերասրահում, Բոյաջյան Արվեստների Կենտրոնում:
