«Այնպես է լինում, որ թախծում եմ, սակայն իմ բնույթով վատատես չեմ, այլ ընդհակառակը: Բայց եթե խորանանք, ապա իմ մեջ խորը վիշտ կտեսնենք - այդ վիշտը կա ողջ հայ ժողովրդի սրտում»:

Հայազգի նկարիչ Ժան Ժանսեմը (Հովհաննես Սեմերջյան) ծնվել է 1920 թ. Սոլոզում (Փոքր Ասիա)։ Մանկությունն անցկացրել է Հունաստանում՝ Սալոնիկում։ Տասը տարեկանում տեղափոխվել է Ֆրանսիա, որտեղ էլ սկսել է զբաղվել նկարչությամբ և հաճախել երեկոյան դասընթացների Մոնպառնասում։

1938 թ. Ժանսեմը ստանում է Փարիզի Դեկորատիվ արվեստի դպրոցի դիպլոմ։ Հունաստան, Իսպանիա և Իտալիա կատարած բազմաթիվ շրջագայությունների ժամանակ նա աշխատում է բնօրինակից՝ պատկերելով ցլամարտի, թափորների, շուկաների, դիմակահանդեսների ու արվեստանոցների տեսարաններ։ Գեղանկարների սյուժեներին զուգահեռ՝ նա իրականացնում է նաև վիմագրություններ ու փորագրանկարներ։

1957 թ. Ժանսեմը միջազգային ճանաչում է ձեռք բերում։ Նրա աշխատանքները ցուցադրվում են Իտալիայում, Շվեյցարիայում, Անգլիայում և առավելապես՝ ԱՄՆ-ում։ 1969 թ. Միցուկոշի հանրախանութների ցանցը Տոկիոյում Ժանսեմի ստեղծագործությունների հետահայաց ցուցադրություն է կազմակերպում, որից հետո վերջինիս աշխատանքները սկսում են կանոնավորապես ցուցադրվել Ճապոնիայում։ Երկու թանգարաններ Գինզայում (Տոկիո) և Ազումինոյում նվիրված են Ժանսեմի ստեղծագործությանը։

ՄՐՑԱՆԱԿՆԵՐ

• 2010թ. Հայաստան Պետական պարգև 
• 2003թ. Ֆրանսիայի Պատվո լեգեոնի շքանշան
• 2002թ. ՀՀ Սուրբ Մեսրոպ Սաշտոցի շքանշան
• 2002թ. «Վահագն» համահայկական  մրցանակ
• 1962թ. Բիենալեի Մրցանակ (Բրյուգե)
• 1958թ. «Կոմպարեզոն» մրցանակ (Մեքսիկա)
   
• ​Ժանսեմն ունեցել է տասնյակ անհատական ցուցահանդեսներ Փարիզում, Նյու Յորքում, Չիկագոյում, Լոնդոնում, Տոկիոյում, Հռոմում, Բրյուսելում, Լոզանում, Բեյրութում և այլուր։ Ֆրանսիական արվեստի ցուցահանդեսի հետ նրա գործերը ներկայացվել են նաև Մոսկվայում։